ෆලෝ කරන්න

Monday, October 10, 2011

පුතු . . .





හතර රියනක්
මොකටැ මයෙ පුත
නුඹේ වත
සඟවන්න පොළෝමත
වැසි බිඳක්
නොවැටුනු අහස් ගැබ
කුමටොදෝ 
කඳුලැලි වැටෙන විට
නුඹට දෙන්නට
දෙතනේ කිරිටික
හිඳිලා නොවැ
පවුකාර දිවියට
දෛවයෙන්
සරදම් සිනාදෝ
වැලලෙන පුතුටත්
හෙලූයේ අවසන

______

Tuesday, October 4, 2011

තනිකඩයි තවමත්ම . . .



සඳ , තරු , හිරු
පෙම් කළද
උණුන්ට
තනිකඩයි අහස
තවමත්ම . . .


නිමේශයක සතුට
තියේනම්
හැම තත්පරයකම
නොවෙනස්ව ,
අපූරුයි නේද . . .


අහස දිහාවට
ඇස් තියාගෙන
මෙහෙම අහනකොට
මම හැමදාම


" එළිවෙන්න ලගයි දැං "


මිමිණුවා අහස ,
අහිංසක ලෙස . . .


හෙටත් මම ඇවිත්
අහන බව 
දැන දැනම . . .

වැටමාර . . .


නුඹ කාටදෝ අයිති
නොසිතමි කිසිවිටෙක . . .

පෙම් කරමි
නුඹට
මලින් හැඩ වෙන
ඉඳ හිට . . .

කටු කම්බි
විසගෝරයින් වෙලාගත්
නුඹේ දිවිය
අමතක කර
සිනාසෙන නුඹට

Monday, October 3, 2011

වීදියක ඉකිබිඳුම . . .



මාවතක
හිරු ,
නඟින බසින
වෙනසක්
නොමදැනෙන . . .

රොස් පරොස් පමණි
තනියකට
ලඟ උන්න
වැටුනු වැටුනු තැනින්
හඩු ගඳ
උරුම වුණ . . .

මමත් පියෙකි
පුත ,
මහ මඟත් අහිමි වුණ
අසරණකමට උදැහනම
නුඹට අතපෑව . . .

Saturday, October 1, 2011

නඩුව . . .


෴෴෴෴


කිතුල ඉතිරෙන්න
තණකොළ
කපලා බහින ගමන
අතරමග
නුඹ
හරකට
ඇන්නාවේ නැතුවද
මට


෴෴෴෴

Friday, September 30, 2011

වන මැද . . .



තටු නොමේරුව
පැටවෙකි
දෙමාපිය රැකවරන
හොර හොරෙන්
මතක අතහරින
තැතදරන ඉගිලෙන්න
කිරිල්ලකට
මිතුරුව . . .

කටුව බිඳගෙන
ලොවට බට සැනෙකින්ම
හිත ඇදුන මුත්
තහනම්ය තවම
මෙ වන මැද
අතු අතර
රමනය
නුඹට . . .

ඇබින්දක්
ඉවසාපන් පැටව
කබරියකට
හසුවන්න මත්තෙන්
තලුමරා රසකර ගිලින
උණුසුම්ව තටු
දිගැරෙන තුරුවත්
මේ විසල් වන මැද
ඇත පිරිතිරී
බෝම වුණු විපරීත
මගහැර ඉගිලෙන්න . . .

Thursday, September 22, 2011

විඩාවුණු සිත . . .

හිතේ කරගැට
පිරී රලුවී
විඳපු දුක්
පැණි රසය වැඩිවී
එයත් තිත්තට
හැරී පෙරලී
දිවියේ රසයක්
නොදැනෙනා ලෙස
ඇයිද මෙලෙසින්
විඩාබර වී . . .

දුරු රටක හිඳ
තනිවු දිවියට
කොයිද පුත නුඹෙ
ලැබී සෙනෙහස
නුඹ නොමැති ලොව
කළු සුදුම මිස
වර්ණ නැත නුඹෙ
සිතුවමේ ලෙස . . .

දිනෙක වියපත්
මාව දුටු විට
හිතේ කරගැට
පිරිමදින්නට
හිඳී වී යැයි
මගේ තනියට
පමණි ලඟ මට
දිවි ගෙවන්නට . . .

පුතේ ඉඳපන්
එනතුරා මම
හරි විඩාවයි
දිවියේ මගෙ ලඟ . . .

Tuesday, August 9, 2011

සුදු පිරුවටය . . .

සුදු පිරුවට ,
එළාලූ ඇඳ මත
පැල්ලමක් ගැන දොඩන
මිනිසුනේ අසනුමැන . . .


ජීවිතේ අභියසක ,
සුදුවන්ව තිබියයුතු
ගුණ සපිරි හදවතක්
නොසොයාම සොයන ඔය
පිරිසිදුවේ වග කුමට . . .

Monday, August 8, 2011

වාරය . . .



ඵල දැරුමට
නැතිය තව අවසර
එනමුදු ,
එළඹ ඇත කාලය
වෙරළු මල් 
සුවඳ ඇරඹෙනා වාරය . . .
කුරුට්ටන් ,
සිත්හී අඹා යහමින් 
නා නාවිද රූ කැටයම්
අත්කම් කරන්නට
පටන්ගෙන රහසේම
හැඳි වතවත් නොසිතාම
තවරගෙන සායම්
සිතුවම් කරමින් ,
සිතියම් . . .

Friday, July 29, 2011

ශිල්පියෙක් අවැසිවේ . . .


වරක් මා අවුදින්
බිඳුණු සිත
සැකසුවා නොවැ
තිබූ ලෙසකම
පෙරලෙස . . .


යලි යලිදු
නුඹ ,
සිඳ බිඳලන්න
සිත ,
සිත්සෙයින් ඉඩහැර
සොයනවා නොවැ යලිත්
පිලිසකර කෙරුමට
ශිල්පයෙහි උගතෙකු . . .

Tuesday, July 26, 2011

කසල ගොඩේ . . .

කසල ගොඩ
වටේ පිරුණු
කපුටු රැලගේ
කරව් හඬට
නිකමට ,
අඩියට දෙකට
ලංවන විට
දැණුනු ,
කිරිකැටි සුවඳට . . .


පිරිලා ඉතිරිලා
දැණුනු හැඟුමට
දිටින් ,
රෙදි කඩින් එතුනු
අහිංසක ,
බිළිඳු රුව . . .


සොයමි ,
තෝරමි ලහි ලහියේ
හැඟුම් . . .


සාප දෙන්නද
වැදූ එකාලට
නුඹ මෙහි දමා
අතැර ගිය පව්කාර . . .


නැහැ ,
ඉගෙනගන් පුතේ
නුඹවත්
නොකරන්න කිසි දිනෙක
මෙලෙසකින් කිසිවිටෙක
ඉගෙන ගන්නට
නුඹෙන් පාඩම්
වැදූ මව්පියනට
මෙළොව . . .

Monday, July 25, 2011

හීන . . .



උදේ කෑවා ,
ඉස්තරම්ම වර්ගයේ 
පොල් රොටියෙන් බාගයක් . . .
ඒකත් සීනි අහුරක් එක්ක
කන ගමන් හිතුනෙත්
දවල්ට කන්න ඕනෙ
බුරියානි . . .

දවල්ට කනවා ,
අර ඉස්තරම්ම වර්ගයේ
ඉතුරු පොල් රොටි බාගය . . .
ඒ කන ගමනුත්
රෑට නම් කොහොම හරි
කන්න ඕන
බුරියානි . . .

Sunday, July 24, 2011

රස්තියාදුවේ . . .


හිත ,

හැඳ පැලඳගෙන
යන්න තනනවා
බැහැරක . . .

Saturday, July 23, 2011

ලියමන . . .


මයේ පුතේ ,

කාරි නෑ
ආවා නොවැ දිනෙක
පහුගිය දෝහේ
ඇති නොවැ එමට
රාජකාරිත් පිරුණු . . .  

බඩ කට පිරෙන්න
හරි රස කැම
පිරිලා යනවා මුළු හිතම
සුවඳට . . .
හිරවෙනවත් වෙලාවකට 
සිහියක් නැතුව කනකොට 
අතින් අනලා 
කවන කටකට වඩා 
රහයි උණු උණුවේ 
හැන්දෙන් කනකොට
කඳුළුත් එනවා වෙලාවකට . . . 

ඔව් පුතේ
අරුමෝසම් එමටයි
රූප පෙට්ටිය දාගත්තම
හරි පංකාදුයි
අපේ කට්ටියත් සතුටින්
හිනැහුණු ගමන්මයි
හැමදාම මෙතන
කඳුළුත් එනවා වෙලාවකට . . .  

යාළුවොත් ගොඩයි
මේ නාකි මට
පවුලේ උන් වගේ
මේ වහලේ යට . . .  

වෙලාවක ,
මුණුබුරොත් එක්කරන්
වරෙන් ඇවිත් යන්න
උන් දැං ලොකුද
ඩිංගිත්තක් බලාගන්න
එච්චරයි මතකයට
එන්නේ නැත්තේ හරියකට
අනිත් හැමදේම නම්
මතකයේ නිමක් නෑ 
නාකිවෙලත් බලාපංකො
මතකය ,
නේද මයෙ පුතේ . . .  

පුළුවං නං උඹේ ඔය 
සෙකට්‍රි නෝනට ,
මතක ඇති තැනක 
තියන්න කියාපං
වැඩ රාජකාරිත් ඇතිනේ
ඒ අස්සේ මේවා කියවන්නේ කොයිද
මම දන්නේ නැතුවෑ මයේ පුතේ
නිවීහැනහිල්ලේ එපෑ කියවන්න
රත්නත්තරේ පිහිටයි
මයේ පුතේ උඹට . . .

Friday, July 22, 2011

ටියුශන් ලඟ . . .




ආලේ පාන සරුවත් පෙම්
පාට පාට දාල හොඳට
සේද සේද සළු දවටන්
පුංචි හිතට වී කුළුපග

සීනි බෝල ටොපි චොකලට්
වියදම දෙන තෑගි බෝග
ජීවිතයේ කඩඉම් ලඟ
සිනා සලයි සරදම් ලෙස

හිතට තුරුළුවූ පත පොත
ඉකිබිඳිමින් ඇත පසෙකින්
ඉස්සර වී පෙම් රැඟුමන්
ජීවිතයම වී සල්ලං

ටියුශන් ලඟ පොරකත් පෙම්
කුමර කුමරි අහුරුපිටින්
වගා නොකර විසිකර පොත
අස්වනු සොයනා ජීවිත

Tuesday, July 19, 2011

නින්ද නුඹ . . .





නිදි දෙව්දුවනි ,
අද රැයත් නුඹ
වෙලී ඉන්න
ඇගේ ලඟ
නොදැනෙන්න ඇයට
හිතේ බර . . .

ඇගේ ලඟ හැංගිච්ච
හීන කප්පරම ,
රැගෙන මම සැබෑකර
එනතුරා හැකිවෙත්ද
රැඳී ඉඳ සනසන්න
මගේ පෙම්බරියව
සුවසේම . . .

Monday, July 18, 2011

තුවාලය . . .


෴෴


නුඹේ අතින් 
හීරිච්ච හිත
අද බලත්දි
. . . පැසවලා හොඳටෝම . . .


෴෴෴෴෴෴

Saturday, July 16, 2011

කිරිල්ලියේ . . .




කිරිල්ලිය නුඹ 
නිදහසේ සැරිසරා 
නුබ අරා 
පියැඹුව

තටු කපා
සිරකළාදෝ 
මම ,
නුඹට පෙම් කර

෴෴෴෴෴෴෴෴෴෴

Wednesday, July 13, 2011

ෆේශල් . . .




වෙන්න සුදුවන් 

අපේ උන් කරති
. . . නා නාවිද කැටයම් . . .

දිවිය වන විට අඩවන් 
ගැලවේය බැඳි මුහුණු
. . . ගිලිහෙන වේදිකාවෙන් . . .


෴෴෴ 

Saturday, July 9, 2011

රැඩිකල් කවි . . .




හිතේ අහුමුළුවල
හැංගිච්ච වචන
පිරිමැදලා , ඔප කරලා
විටෙක මුවහත් කරලා
ගලපලා එළියට දාලා
පස්සෙන් පහු
උප්පැන්න හදනවා

" . . රැඩිකල් ලූ . . "


෴෴෴

Thursday, July 7, 2011

වැල්ල . . .



පිය සටහනක්වත්
නොවැදුණු ගානට
රැල්ල ඇවිත්
වැල්ල සකසලා
. . . සුසිනිඳුවට . . .

කොහෙන්දෝ ඇවිත්
හාංකවිසියක් නැතුව
ආයෙමත් පය ගහලා
අවුල් කරන වැල්ල ගැන
රැල්ලට ,
කිසිම ගානක් නැතුව ඇත්ද
. . . දැණුනු . . .

෴෴෴

හිතද නුහුරද . . .




තුඩ ,

මොට්ට පැන්සල
ගැලපුවා පද
අපූරුවට
ගානක්වත් නැතුව . . .


ඊයේ මම ,
මොට්ට වෙච්ච
පැන්සල ,
උල්කරා තුඩ
සිහින්වෙන තරමට
හොඳට . . .


තව තව ,
ලියන්න හිතාගෙන 
හොඳට . . .


දැං දැං ,
කොයි තරං මොනවා හිතුනත්
ලියවෙන්නෙම නැති හැටියක් ,
හරියට . . .


හිතද ,
නුහුරද . . .


දේශපාලනය . . .



නෑ මගේ ලඟ

පාට නම් ගෑවිච්ච
මැදහත්ව හිඳ
කියමි මෙබස
බර කර . . .

නඩු බඩු දෙකම
හාමුදුරුවන්ගේයැ
කිය කියා දඟලන
කීදෙනෙක් මඩි
තර කරගණුද
විකුණා මුකරිකම
සමඟ එකට අනා බස
සැඟව එක එක ,
පැලඳි මූණට . . .

--------------------- : කොහිද ජයගණු මෙලෙස විප්ලව

Tuesday, July 5, 2011

කුඹුරු කෙටිල්ල . . .


මේ තියෙන්නේ මුහුණු පොතේ අපේ කට්ටිය සෙට් වෙන සිත් පාවාඩ ගෲප් එකේ කට්ටියත් එක්ක එකතුවෙලා කුඹුරු කොටපු හැටි . මට හිතුනා ඉතිං මේක නොදැක්ක අයට බලාගන්නත් එක්ක බ්ලොග් එකේ පොඩි පෝස්ට් එකක් දාන්න .  මෙතන ඉන්න සමහරුන්ව නම් ඕගොල්ලො අඳුනනවත් ඇති . බ්ලොග් කරලියේ රස්තියාදුකාරයා , පොඩි මෑන් , පාදඩයා  වගේ කස්ටියත් මෙතන ඉන්නවා .



Ridma kasun

ගොඩමඩ දෙකම සරුසායයි කිරි සුදුය
ගොඩ මඩ මැදින් ගලනා ගඟ මනහරය
පැනලා නාන්නට හිතුනත් මට බයය
රේන් කෝට් එක අද මට අමතකය  

Saumaya sandaruwan
රේන් කෝට් නැතිවට නම් කම් නැතිය
දන්නා කියන කුඹුරක් නම් මඩ නැතිය
නියරක් දිගේ නම් ඈතට යා හැකිය
අනුන්ගෙ කුඹුරු වල ගොවිකම් තහනම් ය  

Ridma kasun
කුඹුරේ අයිති කරුවෝ නෑ කොටන්නට
පුරන් වෙන විදිට දැකලා දුකයි මට
අදේටවත් දෙන්නැති කොට හාන්නට
හොරෙන් ඇලේ ගිලෙනව මම නාන්නට  

Saumaya sandaruwan
හොරෙන් ගිලී නෑවත් නුඹ ඉතිං ඇලේ
නියර දිගේ එනවිට නුඹ රිද්ම මලේ
මඩත් එක්ක ගෑ වී ඇති නිසා ජලේ
පෙනේවි ඉතිං නුඹ බැස ආ බව ම වෙලේ  

Ridma kasun
වෙලේ බැහැල ආවම මඩ තැවරෙනවා
ඇලේ පැනල නෑ වම ඇස් රතු වෙනවා
යායේ කොන තලේ ගල් මම වැතිරෙනවා
හතිගිය පසු ආයෙත් කුඹුරට එනවා

Sushan Priyanath
මඩ නැතිවද
ඉහිරි හැම අත
පුරංවනු දැක
වැපුරු කුඹුරක   

MKCP sasheen
කරක් ගහල මහ බඩවැටි කුඹුරු වල
ඇලක් දොලක් ගානේ සිල් බිඳපු කල
වලක් ඉහා ගන්නට මට නැතිව කල
තෙලක් හොයා පොල් බෑවෙමි සමග මල   

Sushan Priyanath
හතිය නොබලා
කොටනු විගසින
උපරිමය දැක
විඩාලනු හැක  

lakmaal Jayasinghe
පුරන් වෙච්ච කුඹුරක් ලඟ බිඳක් හිඳ
ගැලෙව්වාට වල් පැලයක් දෙකක් මම
සින්න කරන් කුඹුරු අරන් විඳින දුක
දන්න එකා කියපන් මට දැනගන්න   

Saumaya sandaruwan
වෙලේ නටා මඩ ගා ගන්ටත් බැරිය
ඇලේ නාන්නත් හිත හීලෑ මදිය
ගලේ නිදනු බෑ, එය රත් වී වැඩිය
මලේ මෙදා මමනං අඳයට නැතිය  

Ridma kasun
පුරන් වන නිසයි මම හෑවේ කුඹුර
පොඩි පොඩි ලියදි වල අස්වනු හරි අඩුය
හේනක් කොටාගෙන ඉන්නෙක හරි සැපය
නැති බැරි කලට කුඹුරත් ගෙන දෙයි සැපය   

Grawi
කොයි කුඹුරක් හෑවත් තොපි බොලන්නේ
ගිරවිට වී කරල් ඉතිරිව තබන්නේ
රෑන පිටින් ඇවිදින් සැරි සරන්නේ
නිදිමත වැඩියි බයිලද මම කියන්නේ   

Sushan Priyanath
වෙස්සන්තර ගති මා ලඟ නම් නැතිය
මගේ කුඹුර අඳයටවත් දෙනු නැතිය
හොරෙන් පනිනවුන් අල්ලා ගනු හැකිය
රකිමි පැලේ හිඳ මා නම් කුඹුරෙමය   

lakmaal Jayasinghe
වැස්ස නැතිව පුරන් වුණත් යස කුඹුරු
වැස්ස දාට එකවර වෙයි මඩ ගොහොරු
කාලෙ බලා කෙටුවොත් එයි යස ඉසුරු
නොදත් එකා වැලලෙයි මඩ යට කුඹුරු   

girawi
කුබුරෙම ඉදන් නුඹ තනි රකිනා වේලේ
වී අරගෙන යන්න මම එන්නෙමි රාලේ
හරකුන් රැසක් ඒ දැක හිද ගොන් ගාලේ
උම්ම්බෑ කියය් නුඹටයි ඇමතුම රාලේ  

Ridma kasun
පැලේ ලැගන් උඹ කුබුරේ ඉන්න කොට
ඇලේ පැනල නානව මම හොරෙන් අද
බඩ වැටි යටින් ම රිංගන් යනෙන කොට
වෙල ලග පැලේ උඹ තාමත් නිදිද බොල  

lakmaal Jayasinghe
බජිරි ගොඩිරි දුන්නත් හැම සුර සැපය
වී ටික කන්න ගිරව් ඒවි ඒ හැටිය
දිවා රැයේ ඇස් දෙක ලෙස ගත්ත රැක
කුඹුර දැකල මට දැනෙනව නිවන් සැප  

girawi
ඇදගෙන නාල රිද්මය්යා කුබුර ලග ලිදෙන්
හාගෙන කුඹුර ස උම්මිය ඉන්නව ඉතින්
සු ෂාන් සී සන්නට හරකෙක් සයඉ ඉතින්
ලක්මාල් වැඩක් නැත්තන් ගොස් ව්දව් වෙයන්   

MKCP sasheen
උඹෙ පැලේ හිල් ඇති වහලයේ හිඳ
රීමික්ස් කර කියනව මගෙ පැල් කවිය
තලේ උලට ඇති උදැල්ල මගේ නෙව
මලේ උඹට කුඹුරත් නැති වෙනව හෙට  

Ridma kasun
පැනලයි නෑවෙ නෑ ඇදගෙන මම නෑවේ
සවුමා ඇවිත් ගල උඩ ඉද තනි රැකුවේ
සුශා ඉදන් නිදි කිර කිර පැල් රැකුවේ
ගිරවිගෙ කුබුර පාලු නිසයි දොස් නැගුවේ  

lakmaal Jayasinghe
උදවි කලොත් මිතුරට මට සුර සැපය
මිතුරගෙ බිරිඳ වුමද එය වෙනස් නැත
ඉඳල හිටල වැඩ වරදින තැනුත් ඇත
ඇදන් නෑම පැන නෑමට වැඩිය හොඳ   

girawi
මගෙ කුඹුරට මොන පාලුද රිද්ම මලේ
සොමි සද තනි රකී හැමවිට අදුරු වෙලේ
පැල් බැදගෙන උඹලා කවි කියන කලේ
සද පායලා ඉගි බිගි පානවා මලේ   

lakmaal Jayasinghe
හඳ වගේද කුඹුරට ගොවියකුගෙ අගේ
දෑතින් අරන් සලකයි ඔහු දිවා රැයේ
හ‍‍‍ෙඳේ සිසිල මදි නොවේද ගිරා ල‍ෙඳේ
හොඳ කල් බලා අඳයට දෙනු කුමුර උඹේ 


ඔන්න පේනවනේ අපේ කස්ටියගේ වැඩ . . . :P මේ සේරම ජොලියට හොඳේ . . . . :)

෴ 

නුඹ ලඟ . . .




ලඟ
හිඳිනා බැව් දැනෙන්න
ඇති නුඹේ ඔය
කණ වැටෙන
. . . හුස්ම හඬ . . .

මටත් තව එක වරක්
මඳක් තව හුස්මගෙන
ජීවිතය එනතුරා
බලාපොරොත්තුවෙන් බිඳක්
තුරුළුකර පොදිබැඳන්
හිඳින්නට නුඹේ ලඟ
 . . . නුඹටවත් නොදැනෙන්න . . .


෴෴෴

Monday, July 4, 2011

එක ගෙයි . . .


අයියන්ඩියේ ,

මගේ පමාවෙන්
නුඹේ ලේන්සුව
හැමදාමත්
දොරේ එල්ලිලා . . .

පිලේ පැදුර
සින්නකරල මට
හීතලේම නිදියන්න . . .



Sunday, July 3, 2011

පෙම . . .



සිරගෙයක් වුණු

මගේ පෙම . . .

නුඹට . . .

ලිහිල් කරනෙමි ,
මිදී සැනහී
ඉපිලයන්නට . . .

නුඹේ දිවි ,
වීනාව වයනට
සුසර කරනෙමි
තත් එකින් එක . . .

Saturday, July 2, 2011

ඔටුවා . . .



මගේ කූඩාරමට
උඹ රිංගලා 
අතපය හතරම
දිගහැරල දාලා 
උඹට ඉඩ දීපු
මටවත් 
දැන් කූඩාරමේ
ඉඩ නෑ

෴෴෴

හොරා පොලිස් . . .




හැංගි මුත්තං
බලාගෙන මං
පොලිසියෙං
නුඹට 
. . . ඇතිවෙනකං . . .

ජීවිතය . . .



උඹත් හරියට
පොල් කුරුමිණියා විදපු
දාර පොල් ගහක් වගේ . . .


උඹටත් හොරෙන්ම 
ඌ විදලා උඹේ හිතට
හිතක් පපුවක් නැති
උඹට ඉතුරු වුණේ
උඹටවත් අයිති නැති
බොල් බොඩේ 
විතරමයි . . .


මම තාමත්
බිමවැටුණු , 
උඹේ අතු දිගේ
ජීවිතය හොයනවා . . .

Friday, July 1, 2011

හැංගුණු . . .




නුඹ 
තිරය පිටිපස්සේ 
. . . රැකගෙන . . .

මම නටලා
ගලවල බහිනකන්
. . . වෙස්මූණ . . .

෴෴෴